ვინ ვართ ჩვენ

ჩვენ გვწამს, რომ მთელი ბიბლია, ძველი და ახალი აღთქმა არის ღვთივსულიერი წიგნი სულიწმინდისგან. ის წარმოადგენს უზენაესი ღმერთის სრულყოფილ გამოცხადებას ადამიანებისათვის. გვევლინება როგორც უტყუარი და საბოლოო ავტორიტეტი ჩვენი რწმენისა და ყოველდღიური ცხოვრებისთვის. (II ტიმ. 3:16, ებრ. 4:12).

ჩვენ გვწამს ერთადერთი ჭეშმარიტი და მარადიული ღმერთის. ის არის ყოვლისშემომქმედი, ყოვლისშემძლე, ყოვლისმცოდნე და სრულყოფილი სიწმინდესა და სიყვარულში.

ღმერთი გამოვლინდა როგორც წმიდა სამება (მამა, ძე და სულიწმიდა). სამი ღვთაებრივი პიროვნება, მაგრამ ერთი განუყოფელი ღმერთი.

ტერმინი „სამება“ არ გვხვდება წმინდა წერილში, მაგრამ სწავლება სამების შესახებ ჩაქსოვილია მთელს ბიბლიაში.

ჩვენ გვწამს, რომ იესო ქრისტე საუკუნო ღვთის ძეა, რომელმაც ხორცშესხმით და ქალწულისგან შობით ადამიანის სახე მიიღო.

ქრისტეს ერთ პიროვნებაში თავმოყრილია, როგორც ადამიანური ისე ღვთიური ბუნება, ორივე სრული სახითა და მთლიანობით. ისინი გარჩევადია, მაგრამ ამავდროს განუყოფელი, ამიტომ ის არის სრული ადამიანი და სრული ღმერთი.

მან ცოდვის გარეშე იცხოვრა და ამით გახდა ერთადერთი მსხვერპლი მთელი წუთისოფლის ცოდვებისათვის (ეფეს. 1:3-5, რომ. 5:1-11, საქმ. 12:4, 1 პეტრ. 1:18-19).

ღმერთმა ადამიანი შექმნა თავის ხატად და მსგავსად, დაასახლა ედემის ბაღში და უბოძა მას თავისუფალი ნება. ღმერთის გაცხადებული ნების მიუხედავად, ადამიანი შეგნებული ცოდვით დაეცა, რის გამოც მან განიცადა როგორც ფიზიკური, ასევე სულიერი სიკვდილი, რაც ღმერთისგან ჩამოშორებას ნიშნავს.

ადამიანი თავისი ბუნებით არის ცოდვილი, დაკარგული და დაღუპული. (ეფ. 2:1-2, რომ. 3:23).

ჩვენ გვწამს, რომ გადარჩენისათვის აუცილებელია ცოდვების მონანიება ღვთის წინაშე და იესო ქრისტეს უფლობის პირადი და გულითადი რწმენა, რაც იწვევს აღდგენას (ხელახლა შობა).

როდესაც გვწამს და ვაღიარებთ მის უფლობას ჩვენს ცხოვრებაზე, ის მოგვიტევებს ცოდვებს, გვიხსნის სიბნელის ბატონობისგან და შეგვიყვანს მის სამეფოში. (კოლას. 1:13).

გადარჩენა ხდება ღმერთის მადლით და არა საქმეებით.

ღმერთი სთავაზობს გამოსყიდვასა და აღდგენას ყველას, ვინც მოინანიებს, მიატოვებს ცოდვას, ძებნას დაუწყებს ღვთის მადლსა და მიტევებას იესო ქრისტეში (საქმ. 3:19-21; რომ. 10:9-10, 1 კორ. 6:9-11, ეფეს. 2:6-10, რომ. 5:1).

ჩვენ გვჯერა, რომ იესო ქრისტემ მკვდრეთით აღდგომის შემდეგ მიიღო მეფობა ცაში და მიწაზე (მათე 28:18).

გვწამს რომ ქრისტე თავისი ეკლესიის მეშვეობით დააფუძნებს და განავრცობს თავის სამეფოს მთელს დედამიწაზე.

მთელი დედამიწა აივსება უფლის დიდებით. (ფსალმ. 110:1, დანიელ. 2:34-35, ესაია 9:6-7, დან. 7:13-14, აბაკუმი 2:14).

ჩვენ გვწამს იესო ქრისტეს ხილული და სხეულებრივი დაბრუნებისა დედამიწაზე, რათა განიკითხოს უღმერთო ქვეყნიერება და გამოითხოვოს თავისი საპატარძლო (ეკლესია).

ასევე გვწამს, რომ იქნება საყოველთაო მკვდრეთით აღდგომა როგორც მართალთა ასევე უმართლოთა და მარადიული სამსჯავრო.

წერილის თანახმად იესოს მეორედ მოსვლისას, მკვდრეთით აღმდგარი და ცოცხლად დარჩენილი მორწმუნენი ატაცებულნი იქნებიან ღრუბლებში და ჰაერში შეეგებებიან უფალს. (1 თეს. 4:13-18; საქმე 1:10-11, იოანე 5:29, 1კორ:15:51-52, გამოცხადება 20:12-15).

ჩვენ გვწამს, რომ ეკლესია არის ქრისტეს სულიერი სხეული დედამიწაზე (1კორ:12:27, ეფეს.4:12).

მიგვაჩნია, რომ ეკლესია არის ღვთის ერთადერთი ინსტრუმენტი მისი სამეფოს განსავრცობად.

ღმერთმა ეკლესია შემოსა ძალით და ნიჭებით მასზედ დაკისრებული მისიის აღსასრულებლად (საქმე 1:8).

ყოველი ხელახლა შობილი მორწმუნე არის განუყოფელი ნაწილი ღმერთის ეკლესიისა.

ჩვენ გვწამს სწავლება ზეცისა და ჯოჯოხეთის შესახებ. ჯოჯოხეთის, როგორც მარადიული სატანჯველი დაღუპულთათვის და ზეცის, როგორც მარადიული სიცოცხლე და ნეტარება გადარჩენილთათვის (იოან. 14:1-3; გამოცხ. 20:11-15).

ჩვენ გვწამს, რომ სატანა არის დაცემული ანგელოზი. ის თავისი დემონთა გუნდით მიზნად ისახავს ღვთის სამეფოს დამარცხებას და მორწმუნეების განადგურებას.

ისინი რეალურად მოქმედებენ, თუმცა ქრისტემ ჯვარზე თავისი გამარჯვებით დაამარცხა სატანა და მისი დემონები. ამიტომ ქრისტიანებს შეუძლიათ ძალაუფლება ხელში აიღონ და გაიმარჯვონ მასზე (ლუკა 10:17-20, კოლასელთა 2:13-15; ეფესელთა 6:10-18).

ჩვენ გვწამს, რომ წმინდა სამების მესამე პიროვნება, სულიწმიდა მკვიდრობს ყოველ მაღლიდან შობილ მორწმუნეში და მიუძღვის იესო ქრისტეს მსგავსებაში.

სულიწმინდა ავსებს მათ ძალით ქრისტიანული ცხოვრებისთვის და მსახურებისთვის.

გვჯერა, რომ სულიწმინდით ნათლობა არის მამის მიერ აღთქმული და ხელმისაწვდომია ყველა ქრისტიანისთვის, რათა განვითარდნენ და იყვნენ იესო ქრისტეს მოწმენი.

წმიდა წერილში მორწმუნეთა სულიწმიდით ნათლობა დასტურდება „ენებზე ლაპარაკის“ ნიშნით. ჩვენ ვახალისებთ სულიწმიდის ნიჭების გამოყენებას და გვჯერა სულიწმინდით მუდმივი აღვსების. (იოანე 14:16-17; საქმე 1:8; საქმე 2:1-4; საქმე 8:14-17; საქმე 10:44-46; ეფეს. 5:18).

ჩვენ გვწამს, რომ წყლით ნათლობა და ზიარება არის ეკლესიის დადგენილება და უნდა სრულდებოდეს რეგულარულად და სათანადო წესით.

გვწამს, რომ ვინც მოინანიებს და იესო ქრისტეს უფლად აღიარებს, უნდა მოინათლოს იმის ნიშნად, რომ კვდება ცოდვისთვის და იწყებს ცხოვრებას უფლისთვის.

ჩვენთვის ზიარება არის იესო ქრისტეს სიკვდილის გახსენება და გვწამს, რომ როცა რწმენით ვიღებთ ზიარებას, მოზიარე ვხდებით ყველა იმ სიკეთისა, რაც მისმა სიკვდილმა და აღდგომამ მოგვიტანა. (საქმე 2:38, მათე 28:19, რომ. 6:1-4, 1 კორ. 10:16-21).

ჩვენ გვწამს, რომ ღმერთმა შესანიშნავად და უცვლელად შექმნა თითოეული ადამიანი, როგორც კაცად, ისე ქალად.

ეს ორი განსხვავებული, მაგრამ ერთმანეთისადმი თავსებადი სქესი ერთად აირეკლავს ღვთის ხატებასა და ბუნებას (დაბ. 1:26-27).

უარყოფა ცალკეული ადამიანის ბიოლოგიური სქესისა არის უარყოფა ღვთის ხატებისა ამ ადამიანში.

ჩვენ გვწამს, რომ ქორწინების ავტორი, განმსაზღვრელი და დამფუძნებელი არის ღმერთი და არა ადამიანი. ამიტომ ქორწინება ექვემდებარება ღვთის დადგენილ წესებსა და რეგულაციებს.

მიგვაჩნია, რომ სიტყვა „ქორწინება“-ს ერთადერთი მნიშვნელობა აქვს. ეს არის კაცისა და ქალის შეუღლება, როგორც ერთისა, რაც დეტალურადაა აღწერილი წმინდა წერილში. (დაბ. 2:18-24, მათე 19:5-6, ეფეს. 5:22-25, 28).

ჩვენ გვწამს, რომ ღმერთმა ადამიანებისთვის სექსუალური სიახლოვე განიზრახა მხოლოდ ქორწინებაში (1 კორ. 6:18; 7:2-5; ებრ. 13:4).

ჩვენ ასევე გვწამს, რომ ღმერთმა ბრძანა, არანაირი სექსუალური აქტი, კაცსა და ქალს შორის, არ განხორციელდეს ქორწინების მიღმა.

ჩვენ გვწამს, რომ ნებისმიერი ტიპის სექსუალური ამორალურობა, მათ შორის: სიძვა, მრუშობა, ბისექსუალური ქცევა, ჰომოსექსუალური ქცევა, ზოოფილია და ინცესტი არის ცოდვა და ღმერთის შეურაცხყოფა. (რომ. 1:26-27, 1კორ. 6:9-10).

ჩვენ გვწამს, რომ ყოველი ადამიანი შექმნილია ღვთის ხატად და მისი სიცოცხლე არის ხელშეუხებელი.

ადამიანის სიცოცხლე ფასდაუდებელი და უაღრესად დიდია ყველა კუთხით, მათ შორის, დაბადებამდე, მოხუცობისას, ასევე ფიზიკური თუ მენტალური გამოწვევისას და ყოველი მდგომარეობისას ჩასახვიდან ბუნებრივ სიკვდილამდე. ამიტომ მოწოდებულნი ვართ დავიცვათ, ვიზრუნოთ და დავაფასოთ ყოველი ადამიანის სიცოცხლე (ფსალ. 139).

ჩვენ გვწამს, რომ ყოველ ადამიანს უნდა მოვეპყროთ სიყვარულით, გულისხმიერებით, თანაგრძნობით, პატივისცემითა და ღირსებით (მარკოზი. 12:28-31; ლუკა. 6:31).

ყოველგვარი გამაღიზიანებელი ქცევა ან დამოკიდებულება ნებისმიერი პიროვნების მიმართ, რომელიც არ ეთანხმება წმინდა წერილსა და ჩვენი ეკლესიის შეხედულებებს, ჩვენი მხრიდან უნდა იყოს უარყოფითად შეფასებული.

ჩვენ გვწამს, რომ ეკლესია მოწოდებულია ღმერთის ნების და განზრახვის აღსასრულებლად. ამიტომ ჩვენთვის ძალიან მნიშვნელოვანია ეკლესიის სიჯანსაღე და მისი დანიშნულების შენარჩუნება.

მიგვაჩნია, რომ ეკლესიაში არსებული მსახურებები და მასში ჩართული ეკლესიის წევრები განაპირობებენ ეკლესიის სიჯანსაღეს და მისი დანიშნულების აღსრულებას.

ჩვენ გვსურს ეკლესიაში შევქმნათ მსახურების ბიბლიური ნიმუში, ამიტომ ეკლესიის მსახურებაში ჩართული ნებისმიერი ადამიანი, ვალდებულია დაეთანხმოს რწმენის ამ განაცხადს და დარჩეს მისი ერთგული ყველა მიმართულებით.

ჩვენთვის მთელი ბიბლია წარმოადგენს უმაღლეს ავტორიტეტს რწმენის და ყოველდღიური ცხოვრების საკითხებში. ამიტომ გვსურს ის გადავცეთ სრული სახით და არა რაიმეს დამატებით ან გამოკლებით.

ჩვენი მიზანია ვიყოთ სიტყვის შემსრულებლები, რომ გარდავიქმნებოდეთ ქრისტეს მსგავსებაში (რომ. 15:4; 2ტიმ. 3:16-17; მათ. 7:24-27; რომ. 8:29; იაკობის 1:22).

ჩვენი სურვილია ვიყოთ ეკლესია, რომელსაც აქვს ცოცხალი ურთიერთობა ღმერთთან. მთელი არსებით განიცდის უფლის თანდასწრებას და თაყვანს სცემს მას.

გვსურს, რომ ჩვენი ლოცვა იყოს ძლევამოსილი იარაღი ყველა პრობლემის გადასაჭრელად.

ჩვენი წყურვილია სულიწმინდის სისავსე და მისი თანდასწრების მოფენა ჩვენზე.

ჩვენ მთელი გულით განვადიდებთ და თაყვანს ვცემთ უფალს პირადად, თუ საჯაროდ. (ებრ. 13:15; ფს. 63:1-5; ფს 108:3; ფს 29:2)

დანიელი 6:3: „მთელ მთავრებსა და სატრაპებში გამოირჩეოდა დანიელი, ვინაიდან ‘აღმატებული სული’ იყო მასში და მეფე მთელ სამეფოზე ფიქრობდა მის დაყენებას.

მიგვაჩნია, რომ ჩვენშიც იგივე სული ცხოვრობს, რაც დანიელში. ამიტომ გვსურს ეკლესიის ცხოვრების ყველა სფეროში, ავაშენოთ ყველაფრის აღმატებული სულით კეთების კულტურა.

ჩვენ ვახალისებთ აღმატებული სულის დამკვიდრებას, ხედვისაკენ სწრაფვას და შემოქმედებითი პოტენციალის გამოვლინებას, ეკლესიაში ყოველი მორწმუნის მხრიდან.

ეკლესიის მსახურების ყველა სფეროში უნდა ჩანდეს მაღალი სტანდარტი და ხარისხი.

ჩვენ ვართ, როგორც ცალკეული ადამიანებისგან შემდგარი ოჯახი, ასევე ოჯახების ერთობლიობაც, ამიტომ ჩვენთვის ღირებულია დავაახლოვოთ ადამიანები და ვასწავლოთ მათ ოჯახური თანაცხოვრება.

ამისთვის ჩვენს ძალებს მივმართავთ სახლის ჯგუფების მსახურების განვითარებაზე, რაც საშუალებას გვაძლევს ვიზრუნოთ ერთმანეთზე, გავაპრაქტიკოთ მოსმენილი სიტყვა, მივწვდეთ დაკარგულებს, ავაშენოთ ნამდვილი ურთიერთობები, აღმოვაჩინოთ ნიჭები, წავახალისოთ სულიერი ზრდა, აღვზარდოთ ლიდერები და შევცვალოთ ჩვენი ცხოვრება. (საქმე 2:42,44,46)

ჩვენი მიზანია აღვჭურვოთ თითოეული მორწმუნე ღმერთის საქმის საკეთებლად.

ადამიანებს ვახალისებთ, რომ შეიძინონ ცოდნა და გააპრაქტიკონ მსახურებაში. თითოეული მორწმუნის აღჭურვისთვის და მსახურებაში მონაწილეობისთვის ვეყრდნობით 4 ბიბლიურ ჭეშმარიტებას:

ა. ყველა მორწმუნე მოწოდებულია მსახურებისათვის.

ბ. ყველა მსახურება არის მნიშვნელოვანი.

გ. ყოველი მსახურება ერთმანეთზეა დამოკიდებული.

დ. მსახურება არის ადამიანის პიროვნული სახის გამოხატულება. (1 კორ. 12:14-16,18,21,25. ეფეს. 4:11-16;)

ჩვენი ეკლესია ის ადგილია, სადაც ჯანსაღი და სიყვარულით სავსე ურთიერთობები მიჩნეულია შეუცვლელად, სულიერი ზრდისთვის და ეკლესიის გაფართოებისთვის.

ჩვენ ძალიან ვაფასებთ ურთიერთობებს, რადგან ღმერთი აფასებს მას.

ჩვენ შექმნილი ვართ ურთიერთობისთვის, ამიტომ ვქმნით ატმოსფეროს ნამდვილი ურთიერთობების დაბადებისთვის და განვითარებისთვის

ჩვენ უარს ვამბობთ „ტოქსიკურ“ ურთიერთობებზე და ყოველ წყენასა თუ კონფლიქტს, „ურთიერთობის 5 პრინციპით“ ვჭრით.

ურთიერთობის 5 პრინციპი:

1. ერთგულების პრინციპი: იყავი ერთგული ურთიერთობებში. ეს ნიშნავს იმას, რომ პრობლემის მიუხედავად პიროვნების მიმართ დარჩე კეთილგანწყობილი. უნდა გავუფრთხილდეთ ურთიერთობებს და შევინარჩუნოთ იგი.

2. პირველი ნაბიჯის პრინციპი: „თუ გაგახსენდება, რომ ვინმეს რამე აქვს შენს წინააღმდეგ, მიდი და შეურიგდი”... (მათე 5:23-24). როცა ვინმესთან პრობლემა გაქვს, ნუ წახვალ სხვასთან სალაპარაკოდ. ჭორი კარს უხსნის ეშმაკს. შენ გადადგი პირველი ნაბიჯი, მიდი მასთან და გადაარჩინე ურთიერთობა.

3. დროის პრინციპი: მოუგვარებელი წყენა და გაუგებრობა, თუ დროში გაიწელება, უფრო გაღრმავდება. ყოველი გადადებული დღით და დროის გაწელვით, ადგილი ეძლევა ეშმაკს. ურთიერთობებში გაჩენილ პრობლემაზე დროული რეაგირება გადაარჩენს ურთიერთობებს.

4. ნდობის პრინციპი: ნდობა გადამწყვეტია ურთიერთობებში. ჩვენ ვენდობით ღმერთის სიტყვას, მაგრამ ასევე უნდა ვენდოთ ერთმანეთის სიტყვებს. უნდა გვჯეროდეს რასაც ერთმანეთს ვეტყვით. თუკი ვინმესთან პრობლემა გაგიჩნდება, მიდი მასთან და ნდობის ატმოსფეროში გაარკვიე ყველაფერი.

5. მეგობრობის პრინციპი: ხშირად გვაქვს მოლოდინი, რომ ჩვენი მეგობრები თვითონ უნდა მიხვდნენ ჩვენს წყენას მათ მიმართ. როცა ასე არ ხდება, ჩვენ ვნაწყენდებით. ნუ გახდი მეგობარს პასუხისმგებელს თვითონ გამოიცნოს რა ხდება შენს გულში. შენი პასუხისმგებლობაა ილაპარაკო შენს პრობლემაზე მეგობრებთან, რომ თავი აარიდო წყენის მახეს და შეინარჩუნო ურთიერთობა.

ამ პრინციპების განუხრელად მიყოლა გადაარჩენს და გააღრმავებს ურთიერთობებს. (ფილიპელთა 2:2-4)

ჩვენი ეკლესია ფოკუსირებულია უფლის დიად დავალებაზე: მათე 28:19-20: „ამიტომ წადით და დაიმოწაფეთ ყველა ხალხი და მონათლეთ ისინი მამის, ძის და სულიწმიდის სახელით. ასწავლეთ მათ ყოველივეს დაცვა, რაც მე გამცნეთ. და აჰა, მე თქვენთანა ვარ ყოველდღე წუთისოფლის აღსასრულამდე”. ამინ!

ჩვენ ვაცნობიერებთ იმას, რომ ეკლესიების დაწყება (განმტკიცება) ღვთისგან ბოძებული დანიშნულებაა. ამიტომ, როგორც კი უფლის მიერ შესაბამისი კარები გაიღება და სათანადო ხალხი აღიზრდება და მომზადდება, მაშინვე გავაგრძელებთ უფრო მეტი ეკლესიების დანერგვას ამა თუ იმ რეგიონში.

2 მეფეთა 7:8-9: „კეთროვნების ლოგიკა“ — „ასე არ უნდა ვიქცეოდეთ“! კეთროვნების მსგავსად მუდმივად უნდა მოვიწვიოთ უფლის სახლში, უფლის ნადიმზე ადამიანები, რომლებიც ეშმაკის ტყვეობაში განიცდიან სულიერ შიმშილს და იტანჯებიან.

ოჯახი უნდა იყოს, როგორც მთის წვერზე გაშენებული ქალაქი, რომელიც ყველასთვის შესამჩნევი იქნება.

ქრისტიანული ოჯახი უნდა იყოს სამაგალითო და ზეგავლენის მქონე საზოგადოებაში.

ჩვენ მიზანმიმართულად ვშრომობთ, რომ ყოველი ქორწინება ეკლესიაში იყოს მაღალი ხარისხის.

ასევე პრიორიტეტად მივიჩნევთ შვილების აღზრდას ღმერთის სამეფოსთვის, რათა გადავცეთ ძლიერი მემკვიდრეობა მომდევნო თაობებს.